اللعنة على الأبراج

بقلم : مجدى إسماعيل            

فى ذلك المشهد التاثيرى اللوذعى (شلولخ) ، حينما انهار رمز الوحدة الوطنية – فى فيلم الناصر صلاح الدين – (عيسى العوام) صارخاً ... إسماعيل حى ، إسماعيل حى .. اللعنة على الأبراج ثارت فى نفسى شجوناً عميقة استعرضت تاريخ الأبراج فى الوجدان الجمعى لشخصى الضعيف . اللعنة على الأبراج .

بداية علاقتى بالأبراج حيث كنت لم ازل طفلاً رياضياً بنادى الجزيرة بالطبع بالقرب من البرج حيث قررنا صعود البرج "المبنى الأعجوبة المرتفع الذى يشبه القلم الرصاص" وكانت صدمتى الأولى بسعر التذكرة التى كانت 4 جنيهات وقتئذ 1995 ، 1996 (طبعاً ما اعرفش تمنها دلوقتى ومش عايز أعرف) منيت نفسى كثيراً بجمال المشهد وروعة ما سأراه ولكن ذهبت امنياتى ادراج الرياح حيث صعدنا ومن الأخر كده لقيته بلكونه بس عاليه حبتين . اللعنة على الأبراج .

فى فترة من فترات حياتى توطدت علاقتى بجريدة الأهرام وكنت دائماً ما أبدأ يومى – أيام الكلية – بتصفح حظك اليوم وكثيراً كيف أضيع فرصة لمعرفة حظ اليوم (حاجة ببلاش كده) وفى الأخر يطلع بعته ! وفى يوم كان حظى المنشور يقول خبر سعيد فى الطريق إليك (قلت يا سلام على الجمال) الحقيقة فى نفس اليوم ظهرت النتيجة وبالطبع وجدت الخبر السعيد أنى سقطت . اللعنة على الأبراج .

وأنا فى السنة الأولى من دراستى بالكلية طقت قى دماغى فجأة أنى أشتغل وادرس – علماً بأنى خريج زراعة عين شنمس – كلية عملية وفيها حضور وغياب اسخم من اى مدرسة ابتدائى ، وقررت انى اشتغل أمن (سيكورتى يعنى) وهو الشغل المتاح بكثرة جداً ومش عايز مؤهلات ولا غيره ، الله جميل قوى أنى اعيش جو الواد اللى بيشتغل ويدرس وعامل فيها (...) المهم جه مكان الشغل كحارس أمن على (برج) سكنى بالمهندسين والشغل كان فترة من الليل للصبح علشان أضبط مع مواعيد الكلية كنت بفكر إزاى اروح الكلية الصبح ارجع البيت الساعة 4 العصر أنام وانزل الساعة 8 علشان اوصل المهندسين الساعة 9 واخرج من الشغل على الكلية !!

أشتغلت هناك بالضبط اسبوع (حلو) كل يوم يجى الدليفرى ادوس زر الانتركم على حسب الشقة ، الدليفرى جه ، يرد على الصوت – خليه يطلع – المشكلة ظهرت فى اول يوم الشغل الساعة 4 صباحاً وانا قاعد تحت البرج السكنى حيث واحدة من السكان وكانت لابسه – اوه – من غير هدوم ودخلت البرج لم استطيع ان أسالها عن وجهتها لأن نظرة واحدة (متفهمونيش غلط) للسيارة اللى كانت راكباها كفيلة أنها تخرس أى تساؤلات فى نفسى .

بعد كام يوم طلعت الهانم ووقفت قدام باب العمارة تقول لسايس الجراج هو ليه بتاع الأمن لما بيشوفنى ما بيقمش يقف لى (حلاوتك) .

الكثير جداً من عبارات الاعتراض (السوقيه) قلتها له وقررت ان أترك الشغل وتحطمت احلامى ان ادرس واشتغل فى نفس الوقت . اللعنة على الأبراج .

احكى عن ايه ولا عن ايه ، عن معسل قص البرج اللى شربته مره وقعدت أكح لغاية ما جبت اسفلت من صدرى ، والا البرجين بتوع امريكا اللى اضربوا وبعدها امريكا قامت وحلفت طلاق 3 انها هتعرف ازاى تلبس العرب والمسلمين طرح .

ولا اغنية الملك "انا قلبى برج حمام هج الحمام منه" اللى سمعتها وأنا مسافر رايح أتدرب – بعد التخرج – فى الاسماعيلية وقبلها بكام يوم كنت فقدت اعز بنت فى حياتى ، صديقتى العزيزة والبنت اللى بحبها .

كل الحاجات اللى فاتت دى خلتنى اكره سيرة الأبراج وكلما ذكر برج فى اى حادثة أصبح قرفان كمن رأى (ديل برص) ولكن الحاجة اللى طيرت اخر برج فاضل فى نافوخى (وهو برج برضه) علشان تكمل (التيته) حينما ربطت بين يوم عرض فيلم الناصر صلاح الدين (اليوم بتاع كل سنة) والفيلم نفسه اليوم هو 4 مايو من كل عام . مش قلتلكم . اللعنة على الأبراج